Starfsþróun í þínum höndum

Algengast er að einstaklingur skipti hversdeginum sínum nokkuð jafnt milli vinnu, frítíma og svefns.

Þetta þýðir að þú notar helming vökutímans í vinnunni. Því er mikilvægt að geta þróað og hlúð að þeirri færni, þekkingu og viðhorfum sem þú býrð yfir - þér og vinnustaðnum til góða. Það sem gerir þig hæfari í starfi eykur starfsgleði, opnar á fleiri tækifæri og hjálpar þér að takast á við áskoranir í síbreytilegum heimi.

Starfsþróun er og verður alltaf samstarfsverkefni starfsmanna og stjórnenda og verður að eiga sér stað til að hægt sé að mæta auknum kröfum og umhverfi sem er í stöðugri þróun. Þú getur haft áhrif á í hvaða átt þú ferð og gert leiðina markvissari. Ef þú hugar að eigin starfsþróun og hefur tækifæri til að þróast í starfi er líklegra að þú sýnir frumkvæði og nýjar hugmyndir kvikni. Á vinnumarkaði þar sem flest snýst um skilvirkni skiptir hæfnin til að sýna frumkvæði og finna nýjar nálganir á viðfangsefnin miklu máli, ekki síst þegar litið er til framtíðar. Þessa hæfni þarf að þjálfa með öflugri og virkri starfsþróun.

Ábyrgð þín sem starfsmanns er að skilja og meta starfsumhverfið, vera meðvitaður um eigin áhugasvið, styrkleika og takmarkanir og gera raunhæfa áætlun um starfsþróun til framtíðar. Náms- og starfsráðgjafi getur hjálpað þér með þetta mat, t.d. með áhugasviðsprófi. Þú getur bókað viðtal þó að þú sért ekki að skipta um starf eða á leið í nám. Fræðslusetrið Starfsmennt, Framvegis og fræðslumiðstöðvar víða um land bjóða upp á viðtöl félagsmönnum að kostnaðarlausu ef þeir eru með stutta skólagöngu að baki.

Þegar þú hefur fundið nám við hæfi er næsta skref að skoða hvernig á að fjármagna það. Þú sem félagsmaður SFR getur sótt um styrki hér vegna náms í starfsmenntunarsjóð og einnig geturðu kannað hvort þú eigir rétt á starfsþróunarstyrk.

Starfsmenntunarsjóður styrkir nám sem tengist starfi, náms-/kynnisferðir erlendis og innanlands, ráðstefnur innanlands, starfsréttindanámskeið, sjálfstyrkingarnámskeið og lífsleikninámskeið.

Starfsþróunarstyrkir eru veittir vegna náms sem er í samræmi við starfsþróunaráætlun vinnustaðar og einnig vegna ráðstefna erlendis sem tengjast starfi.

Úthlutunarreglur er að finna hér fyrir Starfsmenntunarsjóð og hérna fyrir Starfsþróunarstyrki. Einnig er hægt að hringja í síma 525-8340 til að fá nánari upplýsingar.

Á Mínar síður getur þú sótt um styrk og skoðað hvort og hversu mikið þú hefur nýtt þér styrkina, en miðað er við ákveðna hámarksupphæð á 24 mánaða tímabili.

Huga þarf að því þegar farið er í nám að búa til rými fyrir námið innan tímarammans sem manni er skammtaður. Þetta á bæði við vinnutíma og frítíma en algengt er að fólk stundi nám með vinnu sem skapar álag á fjölskyldu og á vinnustaðnum. Í kjarasamningum 2014 samdi SFR við ríkið um launað námsleyfi. Þannig getur starfsmaður, sem unnið hefur fjögur ár hjá sömu stofnun og stundar nám sem fellur að starfsþróunaráætlun viðkomandi aðila, átt rétt á eins mánaðar launuðu námsleyfi. Uppsafnaður réttur getur orðið allt að 6 mánuðir eftir starfsaldri. Nánar má lesa um þennan rétt í kjarasamningnum. Stofnun er heimilt að takmarka þann fjölda sem nýtir sér þennan rétt við 10% á ári. Semja þarf um það við stjórnanda hvernig og hvenær launað námsleyfi er nýtt. Ákvæði um launað námsleyfi er einnig að finna í kjarasamningum við Reykjavíkurborg, Samband íslenskra sveitarfélaga og í kjarasamningi við Samtök fyrirtækja í velferðarþjónustu.

Úrval formlegra námsbrauta er sífellt að aukast og alls kyns nám og námskeið í boði út um allt land. Að sama skapi fjölgar þeim starfsgreinum þar sem hægt er að stytta sér leið með því að fara í raunfærnimat. Spurningin er, hver þín staða er og hvert þú stefnir. Viltu sækja þér nám á framhaldsskólastigi, auka við tölvufærni, fara í háskólabrú eða í háskólanám? Kannaðu hvað er í boði.

Hér er dæmi um nokkra vefi sem opna ýmis tækifæri:

 

Ávinningur vinnustaðar af því að hlúa að starfsþróun sinna starfsmanna er mikill. Þar má meðal annars nefna minni starfsmannaveltu og ánægðari starfsmenn sem eru tilbúnir til að leggja meira á sig en ella. Einnig kemur starfsþróun í veg fyrir stöðnun og kulnun í starfi og stuðlar að frumkvæði. Vinnustaður þar sem virk starfsþróunaráætlun er til staðar skapar umhverfi sem stuðlar að faglegri þróun starfsmanna og auknum árangri. Vinnustaðurinn þinn getur sótt um styrk í Þróunar- og símenntunarsjóð SFR. Markmið sjóðsins er að auka möguleika stofnana á að þróa starfssvið sitt þannig að það samræmist þeim kröfum sem gerðar eru til stofnana á hverjum tíma með því að efla símenntun starfsmanna svo þeir séu færari um að takast á við fjölbreytt verkefni í síbreytilegum heimi. Þá geta forsvarsmenn vinnustaðar þíns leitað til Starfsmenntar sem veitir stofnunum fjölbreytta þjónustu til að greiða leið lærdómsá vinnustað og efla mannauð stofnana. Hægt er að sérsníða námsleiðir, fá mannauðsráðgjafa að láni og panta farandfyrirlestra um fjölbreytt viðfangsefni. Þjónustan er án endurgjalds fyrir félagsmenn SFR. Allar nánari upplýsingar eru veittar á skrifstofu Starfsmenntar í síma 550-0060.
Hér getur þú opnað bækling um starfsþróun með ofangreindum upplýsingum ásamt dæmum um menntun sem félagsmenn SFR hafa lagt stund á.