Úthlutunarreglur Styrktar- og sjúkrasjóðs SFR

 

Heilsa, forvarnir, fæðingarstyrkur, dánarbætur og fleira.

Gilda frá 1. janúar 2019

1. Hver á rétt á styrk?
1.1. Félagsmenn þurfa að hafa verið félagar í SFR í eitt ár til að eiga rétt á styrk. Undanskilið er styrkur vegna krabbameinsskoðunar og hjartaverndar en þá er þriggja mánaða félagsaðild skilyrði. Ekki er hægt að sækja um styrki aftur í tímann, þ.e. umsóknir gilda á því ári sem sótt er um styrkinn.
1.2. Þá skal félagsmaður hafa greitt a.m.k. 23.000 kr. í félagsgjöld síðastliðna 12 mánuði til að fá fullan styrk. Hálfur styrkur er veittur þeim sem hafa greitt á bilinu 11.500-23.000 kr.í félagsgjöld síðastliðna 12 mánuði.
1.3. Félagsmaður þarf að vera í starfi bæði þegar hann sækir um styrk og notar hann.
1.4. Félagsmenn í atvinnuleit geta nýtt sér áunninn rétt ef þeir velja að greiða stéttarfélagsgjöld meðan á atvinnuleit stendur.
1.5. Félagsmenn í fæðingar- eða foreldraorlofi geta nýtt sér áunninn rétt ef þeir velja að greiða stéttarfélagsgjöld meðan á orlofi stendur.
1.6. Félagsmenn halda réttindum sínum í sjóðnum á meðan þeir nýta veikindarétt sinn og það tímabil sem þeir fá greidda sjúkradagpeninga.
1.7. Réttindi falla niður 2 mánuðum eftir að síðasta greiðsla félagsgjalda í sjóðinn berst.

2. Styrktar eru eftirfarandi meðferðir, forvarnir og fyrirbyggjandi aðgerðir:

2.1. Sjúkraþjálfun, sjúkranudd, hnykklækningar
Sjóðfélagi sem hefur verið félagsmaður í eitt ár fær styrk til sjúkraþjálfunar, sjúkranudds og hnykklækninga (kiropraktor) eða sambærilegrar meðferðar, 2.500 kr. fyrir hvert skipti í allt að 25 skipti á almanaksári.
Einnig er hægt að sækja um styrk vegna þjálfunar hjá Hjarta- og lungnastöðinni eða sambærilegum stofnunum.

2.2. Krabbameinsleit og hjartavernd

Sjóðfélagi sem hefur verið félagsmaður í þrjá mánuði fær styrk fyrir venjubundna skoðun hjá leitarstöð Krabbameinsfélagsins eða kvensjúkdómalækni einu sinni á almanaksári. Leghálsstrok eingöngu 4.400 kr.eða brjóstamynd eingöngu 4.400.kr. Leghálsstrok- og brjóstamyndun í sömu skoðun 8.800 kr.(sem er hámarksstyrkur vegna venjubundinnar krabbameinsleitar á hverju almanaksári.)

Einnig getur sjóðfélagi fengið styrk til krabbameinsskoðunar í ristli og blöðruhálskirtli að hámarki 10.000.kr.

Þá getur sjóðfélagi sem hefur verið 12 mánuði í félaginu fengið styrk fyrir framhaldsrannsóknum vegna krabbameins á vegum Krabbameinsfélags Íslands, allt að 10.000.kr. 

Félagsmaður sem hefur náð þriggja mánaða félagsaðild getur fengið styrk fyrir áhættumatsskoðun hjá Hjartavernd að hámarki 20.000 kr. einu sinni á almanaksári.

2.3. Sálfræði-, félags- og fjölskylduráðgjöf
Sjóðfélagi sem hefur verið félagsmaður í eitt ár fær styrk vegna meðferðar hjá eftirtöldum viðurkenndum meðferðaraðilum:
Félagsráðgjafa, fjölskylduráðgjafa, sálfræðingi eða listmeðferðarfræðingi. Ekki er greitt fyrir viðtal hjá geðlækni þar sem það fellur undir
afsláttarkort Sjúkratrygginga Íslands. Ekki er heldur greiddur styrkur ef sálfræðitími er niðurgreiddur hjá heilsugæslu.
Greitt er 50% af reikning að hámarki 80.000 kr. á almanaksári.

2.4. Dvöl á heilsustofnun
Sjóðfélagi sem hefur verið félagsmaður í eitt ár fær styrk vegna meðferðar á heilsustofnun. Greiddar eru 2.500 kr. á dag fyrir allt að 42 daga á almanaksárinu.

2.5. Líkamsrækt
Sjóðfélagi sem hefur verið félagsmaður í eitt ár eða lengur fær styrk að hámarki 23.000 kr. á ári. Reikningar eru viðurkenndir frá eftirtöldum aðilum: Líkamsræktarstöðum, sundstöðum, skíðastöðum eða íþróttafélagi. Einnig önnur líkamsrækt sem telst sambærileg að dómi sjóðstjórnar.

2.6. Augnaðgerðir og gleraugu
Sjóðfélagi sem hefur verið félagsmaður í eitt ár getur sótt um styrk á 36 mánaða fresti  til „laser" aðgerðar á öðru auga 50.000 kr. eða 100.000 kr. fyrir bæði augu.
Einnig er veittur styrkur vegna gleraugna- eða linsukaupa einu sinni á 36 mánaða fresti. Greidd eru 20% af heildarverði reiknings sem er að upphæð 10.000 kr. eða hærri. Styrkur vegna gleraugnakaupa/linsukaupa getur þó ekki orðið hærri en 30.000 kr.

2.7. Tannviðgerðir
Sjóðfélagi sem hefur verið félagsmaður í eitt ár getur sótt einu sinni um styrk vegna tannlæknakostnaðar á 24 mánaða fresti. Styrkurinn nemur 50% af kostnaði sem er umfram 50.000 kr., að hámarki 150.000 kr. Ekki eru teknar eldri kvittanir en frá fyrra ári.

2.8. Heyrnartæki
Sjóðfélagi sem hefur verið félagsmaður í eitt ár getur sótt um styrk á 36 mánaða fresti til kaupa á heyrnartækjum, styrkurinn nemur 50% af kostnaði sem fer umfram 50.000 kr., þó að hámarki 150.000 kr.

2.9. Tæknifrjóvgun
Sjóðfélagi sem hefur verið félagsmaður í eitt ár getur fengið greitt 30% af reikningi vegna smásjár- eða glasafrjóvgunarmeðferða (lyf eru ekki innifalin). Hámarksstyrkur er 150.000 kr. á almanaksári.

2.10. Hættu að reykja – námskeið 
Sjóðfélagi sem hefur verið félagsmaður í eitt ár getur sótt um styrk vegna vegna námskeiðs til að hætta reykingum. Hámarksstyrkur er 15.000.- í eitt skipti á almanaksári


3. Aðrir styrkir

3.1. Fæðingarstyrkur
Greiddur er fæðingarstyrkur úr Styrktar-og sjúkrasjóði SFR. Styrkurinn er jafnhár til kvenna og karla en hliðsjón er höfð af starfshlutfalli. Fullur styrkur er 240.000 kr.,- vegna hvers barns og miðast við að foreldri hafi stundað 100% starf síðustu 6 mánuði fyrir fæðingu barns /barna.
3.2.1. Foreldrar sem eru félagsmenn í SFR eiga rétt á styrk séu þeir aðilar að sjóðnum og uppfylla skilyrði um sjóðsaðild.
3.2.2. Séu báðir foreldrar í SFR, sækja þau um hvort í sínu lagi.
3.2.3. Umsækjandi þarf að vera að lágmarki í 25% starfshlutfalli til að eiga rétt á styrk.
3.2.4. Styrkurinn lækkar í hlutfalli við skert starfshlutfall.
3.2.5. Um ættleiðingar gilda sömu reglur og ef um venjulega fæðingu væri að ræða.
3.2.6. Sé um að ræða fósturlát eftir 18 vikna meðgöngu og andvana fæðingu er greiddur út hálfur fæðingarstyrkur.
3.2.7. Hægt er að nýta styrkinn upp að 18 mánaða aldri barns/barna.
Fæðingarstyrkur er veittur til foreldris gegn framvísun fæðingarvottorðs og staðfestingu atvinnurekanda um að umsækjandi sé með ráðningu þar sem fram koma upplýsingar um starfshlutfall hans s.l. 6 mánuði fyrir fæðingu barns/barna.

3.2. Dánarbætur
Greiddur er 200.000 kr. útfararstyrkur enda hafi hinn látni verið sjóðfélagi í 12 mánuði fyrir andlát. Enn fremur greiðir sjóðurinn útfararstyrk að fjárhæð 100.000 kr. vegna andláts fyrrverandi sjóðfélaga allt að 5 árum eftir að þeir hafa hætt störfum vegna aldurs eða örorku. Þá er greiddur styrkur til félagsmanna vegna andláts barna þeirra 18 ára og yngri. Styrkurinn er greiddur til þess sem útförina annast. Útfararstyrkir greiðast til lögerfingja. Skila þarf inn greiðslukvittunum tengdum útför viðkomandi.

4. Sérstakar aðstæður
Heimilt er, eftir mati sjóðstjórnar hverju sinni, að veita styrk vegna sérstakra aðstæðna sem hafa í för með sér launamissi eða veruleg fjárútlát sjóðfélaga vegna veikinda hans sjálfs eða nánustu fjölskyldu. Allar umsóknir vegna sérstakra aðstæðna þurfa að fara fyrir fund stjórnar styrktar- og sjúkrasjóðs sem fjallar um þær.

5. Hvernig er greitt úr sjóðnum
Gögn: Nauðsynleg gögn verða að liggja fyrir til að sjóðfélagi geti fengið greitt úr sjóðnum. Þessi gögn eru: Sundurliðaður reikningur, sem sannanlega er greiddur með nafni umsækjanda og kennitölu. Á reikningnum þarf að vera áritun/stimpill/merki þess er gefur reikninginn út með upplýsingum um nafn, starfsheiti, kennitölu og heimilisfang eða símanúmer. Fjöldi skipta og dagsetningar meðferða eða kaupa á vöru eða þjónustu skal koma fram á reikningi. Athygli skal vakin á að kvittanir eða aðgerðardagsetningar mega aldrei vera eldri en 12 mánaða, frá því að sótt er um og gögnum skilað inn. Undanskilið eru tannlæknakvittanir.
Greiðslukvittunum skal skila rafrænt á heilsustyrkir@sfr.is eða skrifstofu SFR.
Styrkir eru forskráðir á skattaskýrslu. Heimilt er að skrá kostnað á móti vegna líkamsræktar þegar framtali er skilað samkvæmt reglum ríkisskattstjóra.

6. Hvernig er sótt um styrk?
Til að umsókn fari í vinnslu þarf bæði að fylla út rafræna umsókn og skila inn fylgigögnum. Rafræn umsókn er fyllt út á Mínar síður eða í gegnum Sjóðir og styrkir á www.sfr.is.
Reikninga og/eða greiðslukvittanir og önnur fylgigögn skal senda rafrænt sem viðhengi inni á Mínar síður eða á heilsustyrkir@sfr.is. Einnig er hægt að skila þeim á skrifstofu SFR, Grettisgötu 89, 105 Reykjavík.

Stjórnin áskilur sér rétt til breytinga á reglum þessum án fyrirvara.
Vel útfylltar umsóknir flýta fyrir afgreiðslu styrkbeiðna.

Þetta vefsvæði notar vafrakökur

Þessi vefur notar vafrakökur til að tryggja eðlilega virkni og notendaupplifun.
Með því að nota hann samþykkir þú notkun þeirra. (Þessi tilkynning birtist vegna nýrra persónuverndarlaga.)