Ályktað á aðalfundi

Það voru skýrar og harðorðaðar ályktanir samþykktar á aðalfundi SFR í gær. Fjórar ályktanir voru samþykktar einum rómi sem sjá má í heild sinni á vef SFR hér

Almannatryggingakerfið
Almannaþjónustan á að gegna lykilhlutverki í uppbyggingu velferðarsamfélagsins.. Markmið þess er að tryggja félagslegt og efnahagslegt öryggisnet allra. Tryggja þarf fjármagn til að standa undir því hlutverki.
Allt tekjutengingarkerfi almannatryggingakerfisins á að afnema. Það er ólíðandi ósiður stjórnvalda að tengja saman tekjur og sparnað landsmanna þannig að ævilangur sparnaður verður í sumum tilfellum verðlaus eða verðlítill.

Kjaramál
Á síðustu mánuðum hefur almennt launafólk þurft að þola fréttir af hreint ótrúlegum launahækkunum til forstjóra fyrirtækja og embættismanna sem heyra undir Kjararáð. Aðalfundur SFR fordæmir þá takmarkalausu græðgi sem birtist í launagreiðslum til stjórnenda og stjórna fyrirtækja, sem almenningur á í að stórum hluta gegnum lífeyrissjóði sína.
Almenningur á Íslandi á lífeyrissjóðina!
Nú er tímabært að spyrna við fæti og setja lífeyrissjóðum landsins strangari reglur sem þeir verða að starfa eftir. Í þeim reglum verður meðal annars að setja skilyrði um launastefnu fyrirtækja og tengingu hennar við launaþróun hjá almenningi.

Aðgerðir gegn áreitni og ofbeldi á vinnumarkaði
Aðalfundur SFR krefst þess að atvinnurekendur sjái til þess að aðbúnaður og hollustuhættir á vinnustöðum séu í lagi. Það er mikilvægt að bregðast við og stórefla aðgerðir til að vinna gegn áreitni og ofbeldi á vinnumarkaði með faglegum hætti. Í því verki verður að leggja ríka áherslu á samstarf við starfsfólk.
Um leið og aðalfundur SFR 2018 beinir því til ríkis, sveitarfélaga og annarra atvinnurekenda að bæta aðbúnað, hollustuhætti og vinnustaðamenningu, beinir aðalfundur því til stjórnar félagsins að fylgja þessari ályktun eftir, bæði í starfi félagsins og með því að standa að fræðsluverkefni og umbótaátaki í samstarfi við önnur stéttarfélög eftir atvikum og/eða Vinnueftirlit ríkisins.

Stytting vinnuvikunnar
Kjarasamningar verða að tryggja gott samspil fjölskyldu- og atvinnulífs. Aðalfundur SFR 2018 leggur því áherslu á, að unnið verði að styttri og sveigjanlegri vinnuviku.
Í kjarasamningi við ríkið 2015 var samið um að fara af stað með tilraunaverkefni um styttingu vinnuvikunnar. Nú er komin nokkur reynsla á verkefnið og allir vísar benda til þess að stytting vinnuvikunnar skili ánægðara og frískara starfsfólki og kalli ekki á aukinn kostnað atvinnurekenda.
Aðalfundur SFR 2018 ályktar því að nú sé kominn tími fyrir næsta skref í þessu þjóðþrifamáli og leggur áherslu á að í næstu kjarasamningum verði samið um almenna styttingu vinnuvikunnar og sérstaka styttingu á vinnuviku vaktavinnufólks, án tekjuskerðingar.

Til baka

Mikil gleði á páskabingói

Skemmtilegt og fjölmennt páskaeggjabingó Sameykis fór fram um helgina á Grettisgötu 89. Þar komu saman um 100 manns, börn og fullorðnir sem skemmtu sér saman og spiluðu bingó og fjölmargir fóru heim með páskaegg af öllum stærðum...

Stofnfundur Lífeyrisdeildar Sameykis

Afar fjölmennur stofnfundur Lífeyrisdeildar Sameykis var haldinn 11. apríl síðastliðinn, en á fundinn komu rúmlega 80 manns. Þar voru lögð fram drög að starfsreglum deildarinnar til samþykktar. Kosin var 7 manna...

Háskóladeild Sameykis stofnuð

Háskóladeild Sameykis var stofnuð 4. Apríl með pompi og prakt. Á fundinum voru samþykktar starfsreglur deildarinnar sem verða lagðar fyrir stjórn Sameykis til samþykktar til að þær taki gildi...

Kjarasamningar

Sameyki hefur undanfarnar vikur átt í viðræðum við viðsemjendur sína, en flestir samningar voru lausir 31. mars síðastliðinn. Samninganefndir okkar hafa fundað með fulltrúum ríkis, Reykjavíkurborgar, Sambandi íslenskra...

Ályktanir Sameykis

Framhaldsaðalfundur Sameykis sem haldinn var þann 28. mars síðastliðinn samþykkti eftirfarandi ályktanir:


Skattkerfið og ójöfnuður
Aðalfundur Sameykis stéttarfélags í almannaþjónustu...

Þetta vefsvæði notar vafrakökur

Þessi vefur notar vafrakökur til að tryggja eðlilega virkni og notendaupplifun.
Með því að nota hann samþykkir þú notkun þeirra. (Þessi tilkynning birtist vegna nýrra persónuverndarlaga.)