Trúnaðarmaður SFR er kosinn af félagsmönnum á vinnustað til að gegna því mikilvæga hlutverki að vera tengiliður milli félagsmanna á vinnustað og atvinnurekenda annars vegar og milli félagsmanns og stéttarfélags hins vegar. Trúnaðarmanni ber að gæta þess að samningar á milli atvinnurekenda og starfsmanna séu virtir og að ekki sé gengið á rétt starfsmanna. Þeir standa þó aldrei einir því stjórn og starfsmenn félagsins eru þeim til stuðnings við að leysa úr vanda sem upp kann að koma og heyrir undir starfssvið félagsins. 

Trúnaðarmenn SFR eru um 200 talsins og mynda þétt tengslanet um land allt. Allir eiga þeir sæti í Trúnaðarmannaráði SFR sem fundar öllu jafna einu sinni í mánuði yfir vetrartímann.